Manipur CM hlui Loktak lake scam chungchangah thu zawtfiah

Manipur Chief Minister hlui Okram Ibobi Singh chu state vigilance department chuan Loktak dil tihfaina tur sum cheng vaibelchhe 244 khawih chingpen chungchangah inhnamhnawiha puh a nih avangin thu an zawtfiah.

Ni 12 lai liamtaah khan vigilance and anti-corruption department chuan Okram bakah hian Loktak Development Authority (LDA) project director pahnih Ch Gojendro Singh leh Th Ibobi Singh-te lakah FIR an lo thehlut tawh a, anni pathum hi Loktak dil tifaia ‘phumdis’ paihfaina tur sum khawih chingpenah an puh a ni.

LDA-ah hian Okram Ibobi Singh hi chairperson a ni nghe nghe bawk.

Thawhṭanni khan vigilance official ṭhenkhat chuan Okram hi a chenna Babupara-ah thu an zawtfiah tawh a, sum khawih chingpena puh te hi chhui zui zel an la ni ang.

August, 2008 aṭanga October, 2009 inkar, thla 14 chhunga thil awmdante chhui chian a ni dawn a ni. Vigilance official-te hian Okram-a thu an zawhfiah chungchangah hian thuchhuah mumal tak erawh an la siam lo thung.

Loktak lake scam bakah hian CM hlui leh bureaucrats ṭhenkhat te lakah hian kum kalta September thla khan FIR thehluh a lo ni tawh bawk a, Manipur Development Society (MDS) sum cheng vaibelchhe 180 khawih chingpen-ah puh an lo ni tawh bawk.

Congress in Manipur-a ro an rel lai khan Delhi-based firm, K Pro Infra Works Private Limited kutah Loktak dil aṭanga ‘phumdis’paihfaina tur project hi pek a ni.