Kan ram inches khat pawh Assam kan pe tur a ni lo : Meghalaya Congress

Meghalaya-a eptu party, Congress MLA-te chuan Legislative Asssembly session neih mekah, Ningani khan Assam-Meghlaya ramri buaina chungchangah Special Motion pu lutin, an ram inches khat pawh Assam hnenah pek a ni tur a ni lo, an ti.

Special Motion hi Congress MLA - Mayralborn Syiem, HM Shangpliang, Kimfa Marbaniang leh Ampareen Lyngdoh-ten pu lutin, MLA eng emaw zat chuan 'give and take' policy chu an thlawp lo tih an sawi.

Nongpoh MLA Mayralborn Syiem chuan state pahnihten ramri buaina an neih mek, hmun 12 bakah hmun dangah pawh buaina hi awmin, Assam lamin an ram chin an rawn luh fo thu leh, hei hi sorkar pawhin a ṭul thu a sawi a ni.

Syiem chuan tunhma lamah state pahnihte hi ramri chhehvelah hian hmasawnna hna thawk pawh an remti tih sawiin, mahse tun hnaia Assam hian heng hna thawkte hi a rawn dodal tih a sawi a, "Ramri chhehvela cheng kan mite pawh an tibuai ta fo a ni," a ti.

Eptute motion put luhah hian kum 2009-2021 inarah ramri buaina chhuak, ramri chhehvela chengte tihbuai leh rikrapna hi ṭum 114 a thleng niin a sawi. Ramri hrula chengte chu thlaphang takina an awm reng a ni, tiin a sawi.

MLA HM Shangpliang pawhin state pahnihte chief minister-ten ramri chungchanga inbiakna an neih mekah pawh, tun hma lama thil thleng tawhte ngaihtuah tel a, thutlukna pawh an siam a ṭul thu a sawi bawk. Shangpliang chuan ramri buaina hmunte enfiah a, ram inluahsak a awm em tihte enfiaha, thla tin emaw, thla hnih danah emaw district-level official-ten joint inspection an neih ṭhin a rawt bawk.

Congress MLA hian state sorkar 'give and take' policy chungchang zawtfiah bawkin, "Meghalaya sorkar chuan Assam hnenah eng nge a pek dawn a, Assam aṭangin eng nge a dawn thung dawn?" tiin a zawt. Meghalaya ram inches khat pawh Assam hnenah pek a ni tur a ni lo tiin, Assam hnena pek tur engmah a awm lo tih a sawi. "Meghlaya chuan Assam-in a luahsak a ram chu ala kir vek zawk tur a ni," a ti.

Kimfa Marbaniang chuan ramri hrula chengte chu dinhmun buaithlak tak hnuaia an awm mek a ni tiin, "Assam nge Meghalaya lamah an awm tih pawh an hre lo a ni. District thuneitute chuan a chhan pawh sawifiah loin an voter ID card-te thehlut turin a hrilh bawk,"tiin a sawi. George Lyngdoh chuan tun hnaia Assam chief minister-in Meghalaya nen ramri buaina a nei lo a, Meghalaya zawkin Assam ram chin a chuh zawk tia a sawi chungchang chu sawifiah turin state sorkar chu a phut bawk.

Eptute MLA-te zawhna chhangin, chief minister Conrad K Sangma chuan Assam lam pawhin document hran an nei tih a sawi a, "Court chauhin thutlukna hi a siam thei a ni. Thlir dan hrang hrang aṭang kan thlir pawh a ngai a, tun hma lama thil awm dan leh tunah a awm mek dante pawh kan en tel a ṭul," a ti. Assam CM thusawi chungchangah sawi zui tur a neih bik loh thu sawiin, hmarchhak state tam zawk chu Assam aṭanga indang an nih avangin heti zawnga sawi pawh a ni thei tih a sawi a ni.