Hri leng a ziaawm chuan Horbill Festival 2021 buatsaih dawn

Nagaland sorkar chuan an state chhunga hri lengin ziaawm lam a pan zel chuan kuminah dan pangngai anga Hornbill Festival lawmna buatsaih a tum.

High Powered Committee (HPC) on Covid-19 in review meeting an neihah festival buatsaih chungchang hi an ngaihtuah a ni. Chief minister Neiphiu Rio kaihhruai HPC chuan state chhunga hri leng an thunun theih a, positivity rate chu 5% hnuai lama a awm chhunzawm zel chuan Hornbill Festival hi buatsaih a ni dawn tih an sawi. Hemi rual hian festival hi buatsaih a nih pawhin COVID-19 Appropriate Behaviour chu khauh taka kenkawh a nih tur thu an sawi bawk.

'Festival of Festivals' tia an sawi ṭhin, Hornbill Festival hi kumtinin December 1-10 ah an buatsaih ṭhin a, Nagaland pawhin a lar pui tawh hle. He festival hmang tur hian ram chhung hmun hrang hrang bakah, ram pawn lam aṭanga kal pawh an tam ṭhin hle. Festival hi Kohima district-a Kisama-a Naga Heritage Village-ah neih a ni ṭhin.

Nikum khan Covid-19 hri leng avangin ṭum danga an lawm angin hman theih a ni lo a, virtual mode hmanga neih a ni.

Hri lengin ziaawm lam a pan avangin state sorkar pawhin khuahkhirhna a thlahdul chho mek a, vaccine dose kima la tawhte khualzinte pawh an luh phalsak an ni tawh a ni. Festival chhim tumte tan pawh hotel leh facility dangah pre-booking a tih theih ṭan tawh a ni. September 23 hian Department of Tourism leh Department of Art & Culture chuan festival neih tur atana inbuatsaihna kalpui ṭan dan tur ngaihtuahin meeting an nei dawn a ni.