Assam-ah Sept 20 aṭangin Class 10-te class kal tawh dawn

Assam cabinet chuan September 20 aṭangin high school, high madrassa, residential leh day boarding school-ah Class 10 chu dan pangngai anga class kal chhunzawm tawh turin an rel.

State education minister Ranoj Pegu chuan cabinet meeting zawha chanchinbu mite a kawmnaah, education department chuan a tahtawlin offline class a hawng chho tawh dawn tih a sawi. Hei vang hian zirtirtute leh zirlaite pawh lo inbuatsaih turin a chah nghal bawk.

September 6 aṭang khan Class 12, final year degree leh postgraduate zirlaite chuan class hi an kal ṭan tawh a ni.

Pegu chuan, "Class 10 zirlaite tan standard operating procedure (SOP) ngai chu hman a ni dawn a, classroom pakhatah zirlai 30 aia tam awm phal a ni lo ang. Zirlai ngah deuh school-te chuan section pawh an siam belh a ṭul mai dawn a ni," a ti. Zirna in neitu leh hotute chu thawktuten Covid vaccine dose kimin an la tawh em tih finfiah vek tur leh, school building leh compound-te pawh phuh thianghlim vek turin a ti bawk.