Tripura : Tuialhthei harsatna sutkian nan CM in Rail Tank Wagon tlangzarh

Tripura-a tuialhthei vang vanga harsatna tawh ṭhin sut­kianna turin Tripura Chief Mi­nister Biplab Kumar Deb chuan state chhunga a hmasa ber turin Ningani khan tuialhthei phur thei Rail Tank Wagon a vai liam.

Tripura hian kawngpui leh highway-a harsatna hrang hrang an tawh ṭhin avangin tuialhthei van avang hian harsatna an tawk fo a, petrol la turin thui tak tak an intlar fo a ni.

Biplab Kumar Deb hian Agartala-a Dharamnagar POL depot-ah Indian Oil phurtu rel hi a vai liam a, rel hian tank 26 phurin tuialhthei litre 17, 60,000 a phur thei a ni. Heng tank-ah te hian thla thum chhung petrol a dahṭhat theih bawk a ni.

Chief Minister chuan train wagon tank hmang hian state chhungah petrol leh diesel phurh luh a nih ṭhin dawn thu leh petrol depot-ah nitin kilo litre 600 dah ṭhin a nih dawn thu a sawi. Hei hian tuialhthei van avanga harsatna an tawh ṭhin chu a sutkian dawn thu a sawi a, petrol leh diesel la turin rei tak tak nghah a ngai tawh dawn lo a ni, a ti.

Sorkar laipui leh Tripura sorkar chuan India Oil official-te hnenah thil kalpui dan tur an hrilh tawh thu a sawi bawk.

Chief Minister chuan Prime Minister Narendra Modi leh Mi­nistry for Development of North Eastern Region (DoNER) chung­ah a lawm thu a sawi bawk.