Meghalaya district hrang hrang tan cheng nuai 20 pe
Kar liamtaa Meghalaya hmun hrang hranga rial nasa tak tla khan chhungkaw 2,500 aia tam mah a nghawng a, heng harsatna tuar te chhawmdawlna tur hi district hrang hrangah cheng nuai 20 ṭheuh sorkar in a pe dawn tih Ningani khan Assembly-ah sawilan a ni.
Meghalaya hmun hrang hrangah March 30-a rial nasa taka a tlak avang khan mi tam takin harsatna an tawk a, West Jaintia Hills, West Khasi Hills leh East Garo Hills district-te chu harsatna tuar nasa zual a ni.
Report-in a tarlan dan chuan rial tla khan thingtlang khaw 237 a nghawng a, chhungaw 2,500 velin harsatna an tawk bawk.
Revenue and Disaster Management Minister Kyrmen Shylla chuan nunna em chan erawh an awm loh thu sawiin Mawshynrut, Mairang, Laskein, Songsak, Rongjeng leh Samanda CnRD block huamchhunga chu a tuar nasa zual an ni tih a sawi a, enfiahna kalpui mek a la nih avangin harsatna tawk zat pawh hi an la punchhoh rin a nih thu a sawi.
Kyrmen Shylla chuan Revenue & Disaster Management Department chuan Guwahati-based Regional Meteorological Centre leh North East Space Application Centre (NESAC), Umiam-te chu khaw chin hriat nan an bepawp reng tih a sawi bawk.
District tina deputy commissioner-te hnenah chhawmdawlna atana hman tur cheng nuai 20 ṭheuh an pek tawh thu a sawi.
Rial tla vanga harsatna tawk an tam avang hian Chief Mnister Conrad Sangma pawhin emergency meeting a lo ko tawh nghe nghe a, hetah hian Shylla bakah chief secretary leh official pawimawh eng emaw zat an tel a ni.
Revenue & Disaster Management chuan Deputy Commissioner-te chu rial tla in thlai, in leh lo bakah thil dang a tihchhiat-te enfiah a, chhinchhiahna fel tak siam turin a hriattir nghal bawk.