Manipur-in door-to-door healthcare service siam dawn
Manipur sorkar chuan health assistance scheme, Chief Minister Hakshelgi Tengbang (CMHT) hlawhtling taka a kalpui hnuah,door-to-door healthcare service scheme 'Chief Minister's Health for All' chu siam leh a tum. He scheme hi hmarchhak state zinga kalpui hmasa ber tur a ni ang.
Chief minister N Biren Singh chuan kar liam taa prime minister Narendra Modi piancham lawmna puala Imphal-a faina beihpui thlaknaah he thu hi a sawi a ni.
CM Singh chuan 'Chief Minister's Health for All' scheme chu state mipuite an kawtkaiah ngei an hriselna dinhmun enfiah sak a, health check-up neih sakna tur a nih thu a sawi. Non-communicable diseases (NCD)- hypertension, diabetes, heart disease, kidney ailment, chronic respiratory disease, mental health problems, tuberculosis bakah cancer chi thum - oral, breast leh cervical te enfiah sak hmasak an ni dawn tih a sawi.
Natna neite an natna hriatchhuah an nih hnua a enkawlna pawh he scheme hian a huam tel dawn tih CM chuan a sawi bawk. Anmahni inah damdawite pawh pek vek an nih tur thu sawiin, he scheme hi a bikin kum 60 chunglam, health centre pan harsat tawhte leh dam lo khumbet, kalchhuak theilote bakah sum lama harsatna neiten an chhawr ṭangkai zual dawn a ni, a ti.
Health department-a senior official chuan he scheme hi kumin October chawlhkar hmasa ber atanga kal pui theih an tum thu a sawi.
He scheme kalpui thawh khatna atan hian district 16-a thingtlang khaw 1118-te thlan an ni ang. Health department hnuaia field worker-te chuan an inah an hriselnate endik sakin, damdawite pawh pek nghal an ni dawn a ni.
State healthcare scheme, CMHT hi kum 2018, January 21 khan hawn ṭan a ni a, hemi kum hian India ram puma public health programme ṭha ber lawmman a la zui a ni Kumin August thla thleng khan he scheme hnuaiah hian mi nuai 4.19 an inziakluh tawh. CMHT hnuaiah inziaklut chhung tinte chu health card pek an ni a, he card hmang hian chhungkaw khat tan kum khata cheng nuai hnih hu thleng a thlawnin damdawi lama enkawlna an dawng thei a ni.