AP-in oxygen plant 4 neih belh leh

Arunachal Pradesh chief minister Pema Khandu chuan PM Cares Fund aṭanga siam, oxygen-generating plant pali chu kar liam ta khan a hawng. AP hian oxygen plant hi 24 an nei tawh a ni.

Oxygen plant hawn tharte hi Anjaw, Lower Dibang Valley, Kamle leh Naharlagun-a sorkar hospital-ah siam an ni.

PM Khandu chuan virtual hmangin Pressure Swing Adsorption (PSA) oxygen plant-te hi hawngin, heng a thar palite nen hian an state chuan hospital hrang hrangah PSA plant hi 24 an nei ta tih a sawi. October thla ral hmain a dang 20 siam belh leh an tum tih sawi bawkin, hengte nen hian an state-ah chuan oxygen hi 12,650 LPM an siamchhuak thei tawh dawn a ni, a ti.

"Oxygen plant neih tam a pawimawh zia chu Covid hri leng thawh hnihna vanglaiah khan kan hrechiang hle a ni. Mahse vanneihthlak takin kan state in a tawrh hma khan mithiamten oxygen-equipped bed 100 siam lawk turin min lo hrilh hmasa hlauh a ni, " tiin tunah chuan khum 1,000 an siam tawh a, oxygen indaihlohna avanga nunna chan phah awmtir an tum lo tih CM chuan a sawi.