NFR-in ticket nei lote hnen atangin Rs vbc 51.94 a hmuchhuak

Northeast Frontier Railway (NFR) chuan nikum January aṭanga December thla chhung khan ticket nei lo chunga rela zin, khualzin 7,49,093 zet an awm tih sawiin, heng mite hnen aṭanga sum an hmuhchhuah hi cheng vaibelchhe 51.94 a tling tih a sawi. 

NFR chief public relations officer, Subhanan Chanda-in thuchhuah a siamah, nikum chhunga rel-a zinte an endikna aṭangin khualzin 29,455 te chu an bungrua kente book loin an zin tih hriatchhuah a nih thu leh, heng mite sum an chawitir aṭangin cheng nuai 37.55 hmuh a nih thu a tarlang bawk. 

Rel-a ticket nei lo zin awm ṭhinte dapchhuah nan NFR official-te chuan suprise ticket checking hi an nei ṭhin a ni. India Railway Act of 1989-a sec­tion 137 hnuaiah, ticket nei loa rela zin, luggage book loa zin te chu pawisa chawi tir emaw, tan tir emaw theih an ni.