Assam Assembly in Private school fee khuahkhirhna tur Bill pass

Assam Assembly chuan kar kalta Zirtawpni kalta khan pricvate school fee zat tur biktuk tur leh khuahkhirhna siamtu tur bill a pass a, dan bawh­chhia ten cheng nuai 10 thleng an chawi theihna tur an pass tel.

Assembly Speaker Hitendra Nath Goswami chuan The Assam Non-Government Educational Institutions (Regulation of Fees) Bill, 2018 chu House-ah pass a nih thu sawiin eptu MLA-ten siamṭhat ngai an sawichhuah te sawiho a nih hnuah bill hi pass a nih thu a sawi.

Bill an pass hnuaiah hian sorkar chuan Fee Regulatory Committee pakhat emaw pahnih a siam ang a, anni hian primary, middle, secondary leh higher secondary level-a private school-te fee siam dan kalphung an ennawn dawn a ni.

Committe hi district emaw session judge emaw All India Service Official retired emaw in an kaihruai dawn a. char­tered accountant, civil engineer leh private institute aiawh bakah academician pakhat tal member-ah hian an tel bawk ang.

Assam Higher Secondary Education Council and Board of Secondary Education Secretary pawh member ni nghal tur tih a ni a, committe co-ordinator atan education director chu dah a ni dawn bawk tih bill-ah chuan a inziak a ni.

Committee hian aca­demic session ṭan hma ngeiin private school-te chu category hrang hrangah ṭhenin fee a bituk sak dawn a, bill-ah chuan Fee Regulatory Committe in thutlukna a siam tawh chu Fee Revision Co­mmitte- in an ennawn leh dawn tih a inziak bawk.

Dan an siam hi bawh­chhia an awm a nih chuan zirlai nu leh pate hnenah institution neitu ten fee a let an pek let leh a ngaih dawn bakah cheng nuai nga aṭanga nuai 10 thlengin an chawi thei dawn a ni.

Vawi thum lai dan hi an bawhchhia a nih phei chuan an institution kharsak hial pawh an ni thei dawn bawk.