AP poiltical party hruaituten China chhanglet

Arunachal Pradesh-a political party hruaitute chuan an party daidanna te dahṭhain Thawhṭanni khan China-in India sipai-ten Upper Subansiri district-a Asaphila area-ah ramri an pel nia a puh chu an chhanglet.

State Congress Pre­sident Takam Sanjoy chuan China in March 15-a border personnel meeting (BPM) neih laia Asaphila-a Indian Army patrol dodalna an lantir chu thil mak tak a nih thu leh a ṭhawn thu a sawi.

Sanjoy chuan India sipaite patrolling neihna chu Arunachal Pradesh chhung a nih thu leh, an tihdan pangngai reng a nih thu a sawi a, Beijing thuchhuah siam chu thu belhchian dawl lo a nih thu a sawi a ni.

Rorel lai BJP Vice President Dominic Tadar pawhin Beijing thuchhuah siam chu mak a tih thu sawiin ram hruaitute chu khawvel ṭhang zelah leh inthlak zelah an inthlak ve a ṭul tih a sawi.

State Civil Supplies Minister Kamlung Mossang, Changking District-a Miao assembly con­stituency aiawhtu chuan ram ṭhenawm ten India ramchhung inrelbawlnaah inrawlh theihna dan an nei lo tih a sawi bawk. Mossang chuan India ram chhunga thiltih tur reng reng chu India ramchhunga thuneitute kutah a awm thu a sawi a ni.

Opposition leader leh Peo­ple’s Party Leader (PPA) hruaitu hlun ni bawk Takam Pario chuan China-in India a puhna chu a pawm loh thu a sawi a, politics-ah leh geographic-ah pawh a dik leh dik loh tihchianna a awm lo tih a sawi. Beijing chu India leh Arunachal Pradesh demcoratic inkaihhruainaah an inrawlh tur a ni lo, a ti.

PPA president Kahfa Bengia pawhin China chuan 1962-a India ram a beih hnu aṭang khan India ram chhung zau tak a luah zui niin puh bawk.