Manipur bomb puakah pahnih hliam

Manipur police-te chuan Thawhṭanni khan Thoubal district-ah bomb a puah thu sawiin state dang mi pahnih Manipur-a hnathawka awm ten hliam an tawrh thu an sawi.

Bomb hi Pathianni zan khan Thoubal district-a Thoubal Khunnou locality-ah tihpuah a ni a, damdawi in lam thunei­tute chuan hliam tuarte hi ngaihtuahawm an nih loh thu an sawi a ni.

Police officer Rishikesh Sharma chuan zan dar 8 velah bomb hi a puah thu a sawi a, bomb puah lai hian hliam tuarte hi an muhil tawh tih a sawi. Hliam tuarte hi Uttar Pradesh mi leh Assam mi an nih thu a sawi bawk.

Pawikhawihtute hi man an la ni lo a, police-te chuan hel pawl tih a ni em tih pawh an la hre lo a ni.

Bomb puah hma lawk Pathianni chawhnu khan Police-te chuan Bishnupur district-a Leikai area-ah ralthuam ṭhahnem tak an hmuchhuak bawk. M-16 Rifle pahnih, AK 56 Rifle pali, A-4 Rifle pakhat leh grenade launcher UBL rifle pakhat an hmuchhuak a, hemi kaihhnawihah hian tumah man an nei lo thung.