Tripura in NITI Forum Meet thleng

NITI Forum mee­ting hmasa ber chu nimin khan Tripura khawpui, Agartala-ah neih a ni a, hmarchhak-a hmasawnna nasa zawk neihna tur leh resource zawnchhuah dan tur te ngaihtuah a ni.

Meeting hi NIRI Aayog vice-chairman Rajeev Kumar chuan a kaihruai a, hmar­chhaka kawngpui, railway leh thawhtheihna hmanga inkalpawhna lama hmasawnna lam hawiin meeting hi neih a ni a, hydro power awmsa theihna hmanga power lama hmasawn­na leh agriculture sector lama hma­sawnna tur te pawh ngaihtuah a nih thu Ministry of Development of North Eastern Region (DoNER) thuchhuah chuan a tarlang.

Heng bakah hian organic farming, thlai, thei, hmarcha, damdawi siamna thlai chin dan te, leiṭha chungchang leh lo neih dan ṭha zawk chungchang te bakah bawnghnute tam zawk siamchhuah dan te leh irrigation project kalpui mek-te hmsawnna kawng ngaihtuah tel a ni dawn tih DonER thuchhuah chuan an tarlang a, he thu ziah lai hian chanchin kimchang erawh hriat hman a la ni lo a ni.

Meeting-ah hian eco-touri­sm, rural tourism leh adventure tourism te hmarchhaka chawi­lar­na tur te ngaihtuah a ni dawn a, DoNER Minister Jitendra Singh, hmarchhak chief minis­ter-te leh mi pawimawh eng emaw zat he meetingah hian an tel.

North Easr NITI Forum hi Feb 2018 khan din a ni a, hmar­chhak hmasawnna atana din a ni.

Forum secretariat hi DoNER Ministry-ah din niin hmarchhak state zawng zawng aiawh, chief secretary-te bakah a kaihhnawih central ministry/ department secretary-te an tel bawk a, deputed institution director-te, journalist-te pawh member-ah hian an tel bawk.