Hmarchhaka politics thila buaina chhuah tamna ber Tripura

Hmarchhak state zingah Tripura chu politics thila buaina chhuah tamna ber niin, Arunachal Pradesh leh Manipur-ten an dawt.

National Crime Records Bureau (NCRB)-in Crime in India 2020 report a tihchhuahah, Tripura, Arunachal Pradesh leh Manipur tih loh hmarchhak state dangah nikum chhung khan poltiics thila buaina thleng ziahluh a awm lo.

Report chuan kum 2020 khan Tripura-ah hian politics vanga buaina thleng thubuai 22 ziah luh a ni a, Arunachal Pradesh leh Manipur-ah case pakhat ve ve ziahluh a ni bawk.

Assam-ah nikum chhungin tualthah thubuai 1,131 ziah luh niin, Tripura-ah 114, Meghalaya-ah 79, Manipur-ah case 46, Arunachal Pradesh-ah 45, Mizoram-ah 28, Nagaland-ah 25 leh Sikkim-ah 11 ziah luh a ni.

Damdawi lama thawktute inthlahdaha puhna chungchanga thubuai ziahluh chu Assam-ah pakua a awm a, Tripura-ah pahnih awmin state dangah erawh a awm lo tih report chuan a tarlang.

Thuamchhawm, dowry kaihhnawiha thihna thleng thubuai ziahluh Assam-ah 148 a awm a, Tripura-ah 23; Manipur, Nagaland leh Meghalaya-ah pakhat ve ve awmin Arunachal Pradesh, Mizoram leh Sikkim-ah thubuai ziahluh a awm lo.

Hmarchhak state zingah Assam chu kum 2020 chhunga pawngsual thubuai ngah ber niin case 1,657 ziahluh a ni a, Tripura-ah 79, Menghalaya-ah 67, Arunachal Pradesh-ah 60, Mizoram-ah 33, Manipur-ah 32, Sikkim-ah 12 leh Nagaland-ah pali ziahluh a ni bawk.

Mi rukbo thubuai pawh Assam-ah tam berin case 6,934 ziahluh a ni a, Meghalaya-ah 91, Manipur-ah 81, Arunachal Pradesh-ah 78, Sikkim-ah 32, Nagaland-ah 24 leh Mizoram-ah pathum a awm.

Kum 2020 chhungin Assam-ah pawihkhawihna thleng thubuai ziahluh 1,21,609 a awm a, Arunachal Pradesh-ah 2,503 , Manipur-ah 2,986, Meghalaya-ah 3,744, Mizoram-ah 2,289, Nagaland-ah 1,511, Sikkim-ah 675 leh Tripura-ah 4,653 a awm a n.