Barak Valley-a mini Secretariat siamna tur Rs vbc 116 pawm

Assam sorkar chuan Barak Valley, Silchar-a mini Secretariat sakna turin cheng vaibelchhe 116 a pawm a, kum thum chhungin sak zawh hman tum a ni.

Chief minister Himanta Biswa Sarma chuan ni hnih chamin Barak Valley hi a tlawh a, mini Secretariat sakna tur pawh a hmunah a enfiah nghal a ni.

CM chuan mini Secretariat hi hman a nih hunah administrative work pawh chak zawka kalpui theih a ni dawn tih sawiin, district pathum - Cachar, Karimganj leh Hailakandi official work-te pawh Guwahati pan buai kher ngai tawh loin a thawh thei dawn a, hun leh tha pawh a hek lo sawt dawn a ni, a ti. Sorkar scheme leh programme hrang hrang pawh tikhawtlai loin heng district-te tan hian rang zawkin an kalpui thei tawh dawn tih a sawi bawk.

Sarma chuan Silchar-Aizawl (NH 306) leh Silchar-Karimganj (NH 37) pawhtu Silchar bypass siam mek pawh a enfiah nghal a, official-te hnenah he project hi a rang thei ang bera zo turin a chah bawk a ni.

Silchar-a Red Cross Society multi-ulitily building sakna tur lungphum pawh a phum nghal a, state sorkar chuan he project thawhna atan hian cheng nuai 50 a sanction a, utilisation certificate receipt hmuh hunah cheng nuai 50 dang pek leh a ni ang, tiin Sarma chuan a sawi.