RTI activist-te venghim turin Manipur sorkar hrilh

Manipur Human Rights Commission (MHRC) chuan Manipur sorkar hnenah National Socialist Council of Nagalim (NSCN-IM) helpawl hlaua biru mek, RTI activist palite chu venghim turin a hrilh.

Right activist Wahengbam Joykumar Singh complaint thehluh behchhanin, MHRC hian Director-General of Police leh Special Secretary (Home) hnenah heng activist palite dinhmun chu ngaihven a, vauna an tawk nia sawi chungchang chu ngaihven zui turin a chah.

Complaint thehlutah hian Senapati district-a activist, K Enoch, P Johnson, SP Benjamin leh PR Amos-te chuan sorkarin development work a kalpui chungchanga RTI application an thehluh avangin an chungah NSCN-IM helpawl hi an lawm lo hle niin a tarlang. Nikum January 20 khan Enoch chu helte hian manin, a RTI application chu sut turin an lo nawr tawh a ni. He thil thleng duh lohna lantirna atan leh activist-te an thlawpna lantirin, Senapati-a Taphou Phyamai khaw mi 31-te chuan RTI application 31 hi an thehlut zui ve leh a ni.