Agartala Airport International Airport-a upgrade turin ngen

Tripura Chief Minister Biplap Kumar Dep chuan Agartala Aiport chu International Airport-a upgrade a ṭul thu sawiin hemi kawnga hma la tur hian sorkar laipui a ngen.

Biplap Kumar Dep chuan Nilaini khan thlawh­theihna quality leh quan­tity tihchangtlun a ṭul thu a sawi a, charter flight service siam te, cargo carriers tihchangtlun leh thlawhna ṭumhmuna cold storage leh night landing facility-te tihchangtlunna tur kawngah sorkar laipui ṭanpuina a ngen tih a sawi.

NITI Forum meet Thawlehnia neihah khan a sorkar hmathlir point 23 a sawichhuah thu sawiin Prime Minister’s Office (PMO) leh DoNER Minister Dr Jitendra Singh-te chu Tripura economy tihhmasawn kawnga ṭanpui turin a ngen.

CM chuan Agartala Aiport chu international airport-a siam a pawimawh thu sawiin Dhaka, Syllet, Chittagong, Taiwan, Hongkong, Bangkok leh South East Asian ram te tana zinkawng hmunpuia siam an duh thu a sawi.

Cargo handling capacity pawh tihchangtlun lehzual a ngaih tawh thu a sawi a, food processing industry, bamboo industry, horticulture industry leh tourism lama hmasawnna a nasat avangin cargo handling capacity thuamṭhat chu a hun tawh takzet tih a sawi bawk.

Deb hian Gateway GPRS Support Node (GGSN) leh Serving GPRS Support Node (SGSN)-te dah a ngiat bawk a ni.

CM chuan Tripura-a East West Corridor siam chu hmarchhaka sumdawnna tihchangtlun nan a ṭul thu sawiin, hmarchhak state-te Trans Asian Railways (TAR) hmanga Thailand, Cambodia, Malaysia leh Singapore-te kalpawh theiha siam a nih chuan hmarchhakah sumdawnna leh tourism in hma a sawn dawn a ni, a ti.