Nagaland : PWD in kawngpui siamṬhat nan Rs. vbch. 25 dawng

Nagaland Public Work Department (PWD) Minister Tongpang Ozukum chuan Nilaini khan PWD chuan kawng siamṭhatna tura pawisa dah cheng vaibelchhe 50 aṭangin cheng veibelchhe 25 an hmu tawh tih a sawi.

Chief Minister Neiphiu Rio-an ni 60 chhunga Nagaland state chhunga kawngpui chhia te siamṭhat an nih dawn thu a lo sawi tawh bawhzuina atan Nagaland sorkar chuan PWD hnenah hian cheng nuai 25 a pe a, state khawpui Kohima panna kawngpui bakah district 12 headquarters kawng te chu siamṭhat a ngai nasa hle a, Minister chuan April 9 aṭang khan kawngpui siam hna hi ṭan a nih tawh thu a sawi a ni.

Tongpang Ozukum chuan press conference-ah CM-in a tiam ni 60 aṭangin ni 32 a liam tawh thu sawiin ni 28 chiah hun a awm tawh thu a sawi. Kawngpui siam hna hi PWD in an kalpui dawn thu a sawi bawk.

Minister chuan deficit tam tak a awm avangin sorkar chuan a bul te aṭanga hna an ṭan leh a ngaih thu a sawi a, chona tam tak an hmachhawn thu sawiin kawngpui siam hna chu sorkarin a ngaihpawimawh hmasak zinga mi a ni, a ti.

Sorkar hian kawngpui siamṭhat ngai a list chhuah hi km 217 lai a tling a, cheng vaibelchhe 102 vel sen ngaihnaah sorkar chuan cheng nuai 50 sanction a remti a ni.

PWD Chief Engineer, Limadongdang Jamir chuan a thawhkhat nan sorkarin cheng vaibelchhe 25 an pekchhuah tawh thu a sawi a, alkatra an mamawh ang chi chu Guwahati-ah siamtute an chah tawh thu a sawi.