Sikkim sorkarin Non-organic thlai tam tham tak paih
India rama Organic state hmasa ber Sikkim chuan Nilaini khan non-orgnanic thlai tam tham tak mai state capital Gangtok bazaar aṭanga an man te chu Rangpo sub-division-a Majhitar-a lei laihkhuar-ah an paih a, heng thlai an paihnaah hian Horticulture Department official pahnihin an ṭawiawm a ni.
An thlai paih zawng zawng hi cheng nuai 2.5 man hu a ni a, hetiang zat vel bawk hi state chhung hmun hrang hrangah Nilaini vek khan paih an ni bawk.
Sikkim Chief Minister Pawan Chamling pawhin sorkarin thuchhuah a siam anga organic thlai ni lo zawrchhuah leh hralh a khapna chu a thlawp thu a lo sawi tawh a, Sikkim sorkar chuan April 1 aṭang khan organic thlai leh thei ni lo chu zawrchhuah a lo khap tawh a ni. Hemi avang hian state chhungah vegetables crisis a nasa hle a, CM chuan thlai zuartuten hlep tam an duh avangin sorkar thuchhuah an zawmṭhat loh avangin heng harsatna hi an tawh thu a sawi.