Sorkar laipui leh NSCN-IM-ten inbiakna chhunzawm

Sorkar laipui leh Naga helpawl, National Socialist Council of Nagalim (NSCN-IM) chuan inremna kawng zawnga inbiakna an neih chu kum hnih dawn an chawlhsan hnuah Thawhṭanni khan an chhunzawm leh ta.

Sorkarin inbiakna neihnaa palai atana a ruat, RN Ravi chu thlakin Intellingence Bureau (IB) special director hlui AK Mishra a ruat hnuah, Thawhṭanni khan Dimapur-ah Mishra leh NSCN-IM general secretary Thuingaleng Muivah-te chuan meeting an nei leh ṭan a ni.

Naga buaina chinfel a, inremna siam thuai chu an duh hle tih sorkar laipui chuan a sawi a, hetih lai hian NSCN-IM lam chuan an thil phut zinga pahnih, Naga-te tana flag leh constitution hran neih chu a tel loh chuan buaina chinfel tumna hian awmzia a nei dawn lo tih an sawi thung.

Union home minister Amit Shah aiawha buaina chinfel dan tur buaipuitu tur nia sawi, Assam chief minister Himanta Biswa Sarma leh Nagaland chief minister Neiphiu Rio-te pawhin nimin khan Muivah hi an hmu bawk a ni.

Naga peace talk-a sorkar laipui palai hmasa, RN Ravi khan kum 2015-a sorkar laipui leh helpawlten an ziah, Framework Agreement siam danglam chu a thehdarh avangin inbiakna an neih mekah harsatna a awm chho a ni. Ravi leh NSCN-IM lam pawh hi an inbei tawn nasa hle. Hei vang hianAmit Shah chuan hetih laia Assam finance minister, Himanta Biswa Sarma bakah Neiphiu Rio leh Naga social activist-te chu Delhi-ah Muivah hmu a, an harsatna ngaihthlaksak turin a ngen a ni. Anni pathum hian Ravi chu sorkar laipui a nihna aṭanga thlak turin Shah hi an hmin zui ta a, sorkarin Ravi thlakin a aiawh IB hotu hlui AK Mishsra chu inbiaknaa palai atan a ruat ta a ni. Muivah pawhin Ravi chu palai a nih chhung chuan an inbiakna chuan hma a sawn theih loh tur thu a lo sawi tawh bawk.

NSCN-IM leader R Raising chuan inbiakna chhunzawm leh ni mah se Naga flag leh constitution hran an phutna a tel loh chuan an pawm thei dawn lo a, inremna awmze nei lo a ni dawn a ni, a ti.