Assam-in samak ki 2,479 halral dawn

Assam sorkar chuan vawiin hian samak ki an man 2,479 te chu a halral dawn.

Bokakhat-a public ground-ah chief minister Himanta Biswa Sarma hoiin samak hi an hal dawn a ni. Hemi atan hian gas-powered fireplace pawh siam a ni tih forest official-te chuan an sawi. Samak ki hal dan tur hi Chief Wildlife Warden, MK Yadav enpuina hnuaiah buatsaih a ni.

Samak ki hi a ṭha ngei a ni tih finfiahna awm lo mah se ram hrang hrangah damdawi siamna atana ṭangkai nia rindan nei tam tak an awm. Hei vang hian a ki hralh duh hian samak pawh an pel nasat phah hle a ni.

September 16 khan Assam cabinet chuan hetiang rindan awm ṭhin tihbo a nih theihna atan leh, samak pel an nih fo ṭhin venna kawng khata tan state treasury hrang hranga samak ki an kawlte chu mipuite hmuh lai ngeia hal turin an lo rel tawh a ni. State treasury-a samak ki 2,623 awmte chu high-level committee in a enfiah hnuah, 96 chu zirchiang duhte tana dahṭhat turin a ti a, 50 chu court case bik atana dahṭhat tura ti bawkin, a bak 2,479 chu halral turin a ti.

Akhil Gogoi-a'n dodal
State sorkarin samak ki halral a tum chu eptu pawl, Raijol Dal president leh indepdenent MLA Akhil Gogoi chuan dodalin, halral kher loa museum-ahte dahṭha tura a duh thu a sawi.

Cabinet thutlukna siam chu thutlukna fing tak a ni lo tih sawiin Akhil Gogoi chuan, "Museum-ah dahṭha zawk turin kan duh a ni. Hetianga tihchhiat vek hi nature lover-te chuan an thlawp lo ang, " a ti.