Delhi-ah Manipur KNF hotu man

Manipur-a inlakhran duhtu pawl, Kuki National Front (KNF) self-styled commander-in-chief Mangholam Kigen, David tia hriat bawk chu Delhi-a Dwarka sector 7-ah Thawhṭanni khan Delhi Police-ten an man.

Delhi Police official-te chuan Special Cell-in an thu dawn bawhzuia beihpui an thlaknaah David hi man a nih thu a sawi. KNF hi Manipur-a pawikhawihna hrang hrang, mi sum dil, inrukbo, rukruk leh security force-te hnen ṭanga ralthuam chhuhsaknaahte an inhnamhnawih ṭhin tih an sawi.

Manipur Police-te chuan Kalapahad, Churachanpur-a Nepal mi, Tikram Rizal rukbo chungchangah David hi man tuma an zawn mek a ni. KNF-te hnenah sum tam tak pek a nih hnuah an mi rukho hi chhuah a ni a, police-te chuan he thila inhnamhnawih, David-a thurualpui mi pahnihte chu an lo man tawh a ni.

David hi an state-a kawng siam leh project dang thawk mektu company mi chhawrte enfiah turin Delhi-ah hian a kal nia sawi a ni. An pawl member dangte nen construction company mi chhawrte rukbo dan tur an ruahman niin Special Cell chuan a tarlang.