Sonowal-a'n Assam RS poll atan nomination thehlut

Assam-a Rajya Sabha inthlan neih turah chief minister hlui leh union minister ni mek, Sarbananda Sonowal chuan BJP ticket-a chuh turin nimin khan nomination paper a thehlut.

Nomination paper a thehluhnaah Sonowal hi Assam chief minister Himanta Biswa Sarma, Asom Gana Parishad (AGP) hruaitu Atul Bora leh United Peoples Party Liberal (UPPL) hruaitu Pramod Boro-ten an ṭawiawm. AGP leh UPPL hi Assam-a BJP kaihhruai ṭangrual sorkarah an tel a ni.

CM Sarma chuan Sonowal-a'n nomination paper a thehlut ta chu lawmawm a tih thu sawiin, Parliament-ah Assam leh hmarchhak bial hmasawnna tura mi pawimawh tak a nih tur thu a sawi.

October 4-a Rajya Sabha by-poll neih tur atan hian Congress party leh eptu party dang chuan candidate tur an ruat lo a, vawiin hi nomination thehluh hun tawp a ni a, Sonowal hi chuhtu awm loa a tlin rin a ni.

Assam chief minister hlui Sonowal hi kumin July thla khan union minister atan lakluh a ni.