Meghalaya CM-in ILP chungchangah inbiak duh

Meghalaya chief minister Conrad Sangma chuan an state-a Inner Line Permit (ILP) system hman phuta nawrh huaihawt hrang hrangte chu inbiakna neihpui a duh thu a sawi. 

Thawhlehnia cabinet mee­ting zawh hnua Jowai-a chan­chin thar lakhawmtute a kawmnaah, Sangma chuan a kaihhruai sorkar chuan ILP system hman a nih theihna turin theihtawp a chhuah mek tih sawiin, pawl hrang hrangte pawhin hei hi an hriatpui a, an lo lawm a beisei thu a sawi a ni. 

State sorkar chuan theihtawp chhuah mah se, an thuneihna chin bak a awm a ni tih  hriatpui turin a ngen zui bawk. Sorkar laipui chuan ILP system an dilna pawh hi a thuphung chuan a remtihpui tawh niin a sawi. 

Sangma chuan union home minister Amit Shah nen New Delhi-a inbiakna ṭha tak an lo nei tawh tih sawiin, Meghalaya Assembly-in ILP system hman phutna resolution a pass tawh chungchang pawh ngaihtuah zui a lo tiam tih a sawi. 

ILP chungchangah Amit Shah chuan state aiawhte pawh a hmu dawn tih a lo hrilh tih Sangma chuan a sawi bawk. "Hei vang hian nawrh huaihawt mekte chuan state sorkarin hma a la mek zel tih an hriat a ngai a ni," a ti. 

Hetih lai hian Meghalaya NGO 12 te intelkhawm, Con­federation of Meghalaya Social Organisation chuan an state khawpui, Shillong-ah ILP sys­tem hi a rang thei anga hman phutin nawrh an huaihawt a ni.