Assam : AGP in Citizenship Amendment Bill an dodal chhunzawm zel dawn

Asom Gana Parishad (AGP) chuan Ningani khan Citizenship (Amendment) Bill, 2016 chhu an dodal chhunzawm dawn tih sawiin, an inhnuhhniam dawn loh thu a sawi.

AGP President leh Agri­culture Minister ni bawk Atul Bora chuan anmahnih ram hnualsuat vanga Assam-a lutte citizenship pek tumna a nih thu sawiin, hemi chungchangah hian an inhnukhniam dawn lo tih a sawi a ni.

Bora chuan March 24, 1971 hnu lama Bangladesh mi Assam-a rawn lut te chu an pawm dawn lo tih a sawi a, an party chuan sorkar laipui hnenah hemi chungchanga an ngaihdan an thlen tawh tih a sawi bawk.

Minister chuan bill chhawp­chhuaha awm chu dan kalh a nih thu a sawi a, Assam accord anti-foreigners movement (1979-1985), kum ruk chhung zet hnua ziah a nih khan March 25, 1971 chu ramdang mi pawm theih chin cut off date a nih thu a sawi a, hei hian eng sakhua mah a huam lo tih a sawi.

AGP leh Bodoland Peoples Front (BPF) hi Assam-a BJP thurualpui te an ni a, Chief Minister Sarbanada Sonowal-a kaihhruai cabinet-ah AGP leh BPF-te hi member an nei ve ve a ni.

AGP leh BJP hi 2016 Assam inthlanah khan ṭangrual mah se panchayat inthlan awm turah hi chuan AGP hi a malin an ding dawn thung a, National Register of Citizens (NRC) list update hi zawh a la nih loh avangin panchayat inthlan hun hi puanzar a la ni lo.

Atul Bora chuan Lok Sabha-a BJP an thurualpui dawn leh dawn loh chungchang pawh sawiin Assam leh sorkar laipuia National Democratic Alliance zinga mi an nih thu a sawi a, Lok Sabha inthlan lam an la hawi loh thu leh, midang thurualpui lehchhawn erawh an tum loh a sawi a ni.