Manipur : Congress in block office 27 sakna tur Rs vbch 30 bo thu sawi

Manipur Congress party thupuangtu Kh. Joykishan Singh chuan Congress Bhavan-a press conference-ah sorkar lai chu pawisa tam tham tak chin hriat loha tiboah a puh.

Kh. Joykishan Singh chuan block office 27 sakna tur leh a dang 43 repair-na tur cheng vaibelchhe 30 chuang chu a bo tih a sawi. Singh chuan sorkarin heng pawisa hi thingtlang leh hill area tihchangtlun nana a hmang nia a sawi chu khawiah tak hian nge a hman tih a sawichiang tur a ni, a ti.

Pawisa awmna chin mumal taka hriat a duh thu sawiin district headquarters-te tihchangtlunna tur cheng vaibelchhe nga ṭheuh an dawn tur chu an hmanna a hriat duh thu a sawi a, Jiribam leh Kangpokpi tana cheng vaibelchhe khat ve ve an sacntion pawh chu khawiah nge an hman a hriat duh thu a sawi.

Singh chuan pawisa lo kal chu Congress emaw BJP emaw ta tur a ni lo tih sawiin, mipui­te tana lo kal a nih thu a sawi bawk. Cong­ress chuan heng pawisa te hi thil dang­ah an hmang nia an ngaih thu a sawi a ni.

Joykishan Singh chuan mipui duh­dan a nih chuan hemi chungchang bakah Loktak scam chungchanga bank guaran­tee tel miah loa advance payment an tih te pawh kha chhuichiang tura CBI kohluh an duh reng thu a sawi bawk.

Singh chuan civil secretariat building, Prime Minister hawn tura ruahmanna awm vek tawh Congress Legislature Party-in zawh fel loh a nih thu an chhuichian hnua an ṭhulh leh chu thil mak tak a nih thu a sawi bawk.

Congress hruaitu chuan civil secretarit sak mek chu chawlhsan a nih chuan a sakna atana cheng vaibelchhe 10 sanction kha khawiah nge hman a nih tak ang? tiin sorkar chu a zawt. Singh chuan pawisa bo chungchang chu chhuichian a ṭul thu sawiin thil diklo taka tih a nih chuan thilsual titu chunga action lak ngei a ngaih tur thu a sawi a ni.