TMC rally khapsak chungchangah Tripura HC inrawlh duh lo
Tripura khawpui, Agartala-a Trinamool Congress (TMC) in public rally huaihawt an tum chu police-ten ṭum hnih phalna an pek duh loh hnuah TMC hi Tripura High Court-ah petition an thehlut a, mahse High Court chuan sorkar thutlukna siam chungchangah hian inrawlh a duh lo tih a sawi.
TMC petition hi Justice Arindam Lodh awmna single bench chuan ngaihtuahin, state sorkarin politics thila buaina a chhuah leh venthawn thila Diwali thleng mipui punkhawm a khap chungchangah inrawlh an tum lo tih sawiin, case pawh hi a titawp nghal a ni.
Advocate general Siddhartha Shankar Dey chuan, "Court hi political party-ten rally leh punkhawmna an huaihawt chungchangah phalna petu leh dan siamtu angin a awm ngai lo. Hei vang hian petition an thehluh pawh hi court chuan a hnawlsak a ni," a ti. Festival lian tham tak, Durga Puja (Shrodotsava) thlen dawn vang leh Covid hri a darh palh hlauhthawn vangin state pumah punkhawm khapna, Section 144 hman mek a ni tih a sawi. Hemi rual hian Covid-19 kaihhruaina dante ṭha taka zawm a nih dawn chuan Puja lawm hi a khap chuang lo tih a sawi bawk.
"State chhunga Covid-19 hri leng thawh thumna a thlen mai hlauhthawnna a awm a, tunhnaia political rally hrang hrang neiha boruak ṭha lo tak a chhuak fo bawk a ni. Sorkar chuan festival laia buaina chhuak vanga mipuite harsatna an tawh a duh lo a ni. Hei vang hian September 21 aṭangin November 4 thleng Section 144 hi a puang a ni," a ti. He thupek hi court-in TMC petition a ngaihtuah hma ni chiahin West Tripura District Magistrate Rajib Datta chuan a puang a ni.
TMC hruaitu leh MP Shanatanu Sen chuan sorkar thupek tihchhuah chungchang hi chhangin, Tripura-a BJP kaihhruai sorkar chuan TMC chu a hlau a, BJP mi leh saten TMC an zawm an hlauh avangin political activity an neih turte chu a theih dan angin a dansak zel tih a sawi. High Court order chungchang chu sawizui an tum lo tih a sawi a, hemi rual hian Tripura mipuite tan state chuan theihtawpin hma an la zel dawn tih a sawi.