Hmarchhak bialah Heritage Aviation-in helicopter service tir dawn

Delhi-a hmunpui nei, India rama helicopter leh aircraft charter company ṭhangduang ber zinga mi, Heritage Aviation chuan hmarchhak biala helicopter a service tir dawn.

Sorkar laipui chuan UDAN scheme hnuaiah he company hi hmarchhak biala service a lo phalsak tawh a ni.

Heritage Aviation CEO Rohit Mathur chuan, " A tirah Guwahati-Nagaon, Guwahati-Tura leh Tura-Shillong inkarah 7-seater( Airbus H 130T2) helicopter kan service tir phawt ang. Guwahati-Nagaon leh Guwahati-Tura inkarah ni khatah flight pahnih thlawh tir a ni ang a, Tura-Shillong inkarah chuan ni khatah ṭum khat thlawhtir a ni thung ang, " a ti. November thla aṭangin service tir theih an tum thu a sawi bawk.

Company hian Guwahati-Shillong inkarah service pawh an dil a, mahse an dilna hi ngaihtuah a la ni mek.

Heritage Aviation hi kum 2009 khan Uttarakhand-a Guptkashi-a helipad aṭangin a service ṭan a ni.