AP Governor-in sipai martar hriatrengna siam tum thlawp

Arunachal Pradesh governor Brig (Retd) BD Mishra chuan 3rd battation Assam Rifles sipai, kum 1992-a Punjab-a firfiakte nen an inbeihnaa a nunna chan, Sepoy Agoi Wangsa chawimawina leh hriatrengna state sorkarin siam a tum chu a thlawp thu a sawi.

State PWD minister Honchun Ngandam leh Longding-Pumao MLA Tanpho Wangnaw-te nena Raj Bhawan-a an inkawmnaah, Governor chuan state sorkar hmalakna hi a thlawp thu a lo hrilh. Wangsa hi a thih hnuah sipai chawimawina, Shaurya Chakra pawh hlan a lo ni tawh a ni.

Governor chuan Wangsa hriatrengna hmun hi Longding-ah a rang thei anga siam a ṭul thu sawiin, a huaisen leh ram tana a inpeknate chiang taka pholan a ṭul a ni, a ti. Hriatrengna hmunsiam chu khawchhunga hmun ṭha lai leh hmuh awlsam, hmun hla tak aṭang pawh a hmuh theih tura siam a ngaih thu a sawi bawk.