Sorkar laipuiin Assam CM-in ULFA-I inbiakna neihpui a phalsak

Assam chief minister Himanta Biswa Sarma chuan Paresh Baruah-kaihhruai United Liberation Front of Asom-Independent (ULFA-I) helpawl nena inbiakna neih chu union home minister Amit Shah-a'n a remtihsak thu a sawi.

Chanchinthar lakhawmtute a kawmnaah, CM Sarma chuan New Delhi-a Amit Shah nena meeting an neihnaah helpawlte inbiakna chu kalpui ṭan tura a ngen thu a sawi. "May thlaa sorkar thar lakluh a nih hnuah sorkar hian official ni loin, midang kaltlangin ULFA commander-in-chief Paresh Baruah chu alo be pawp tawh a ni. Hei vang hian Union Home Minister hnenah ULFA hotu hi direct-in ka be dawn nge, midang kaltlangin kan be chhunzawm dawn tih ka zawt a, keimahni nen ngeia inbiakna hi kalpui turin mi ti a ni. Inbiakna kalpui a nih aṭanga hun eng emaw chen hnuah inremna tluantling a awm theihna turin sorkar laipui pawh a rawn tel ve ang," a ti.

Eptuten Naga Peace talk-a Sarma inrawlh dan zawt
Hetih lai hian Assam-a eptu party, Congress chuan Naga peace talk neiha Assam chief minister Himanta Biswa Sarma inrawlh leh chanvo a neih dante an zawt.

Assam Pradesh Congress Committee president Bhupen Kumar Borah chuan thuchhuah siamin, sorkar laipui hnenah Nagaland-a peace talk neiha Assam CM inrawlh dan chin chu sawichiang tura an phut thu a tarlang. "Assam CM hian NSCN-IM-te hi eng ang chinin nge a biak theih dawn? CM a nih avang hian Assembly leh cabinet-te thurawn leh remtihpuina nei loin a tel ve ngawt thei tihna em ni?" tiin an zawt.

North-East Democratic Alliance (NEDA) convener ni bawk, Sarma hi Thawhlehni khan Nagaland-a kalin, Naga helpawl NSCN-IM hotu Thuingaleng Muivah chu Chumukedima-ah a hmu a ni. Sorkar laipui leh NSCN-IM ten inremna kawng zawnga inbiakna an neih chu kum hnih dawn an chawlhsan hnuah Thawhṭanni khan Kohima-ah an nei chhunzawm zel a, inbiakna an neih tukah Assam CM hian NSCN-IM hi a hmu ve nghal a ni.