Assam-in khuahkhirhna thlahdul zel October 1 aṭangin tourist spot hawng tawh dawn

Assam sorkar chuan an state-a Covid-19 hri lengin ziaawm lam a pan zel avangin khuahkhirhna a siamte pawh a thlahdul zel a, nunphung pangngai ang an zawh chho leh hnai tawh tih an sawi.

Chief minister Himanta Biswa Sarma chuan Nilaini khan chanchinthar lakhawmtute a kawmnaah hei hi sawiin, "State sorkar chuan economic activity-ten ngai an awm chhoh theihna turin Covid khuahkhirhnate thlahdul chhoh zel a tum a, hri leng tuar nasa ber zinga mi tourism sector pawhin hma an lak ṭan theihna turin October 1 aṭangin state chhung tourism destination zawng zawng chu hawn vek a ni tawh ang," a ti.

CM chuan khuahkhirhnate thlahdul belh zel a nih theihna turin state mipui, puitling chin chu vaccine la ṭha turin a ngen nghal bawk. "Tun thlengin state mipui vaibelchhe 2.28 ten vaccine hi an la tawh a, heng zinga vaibelchhe 1.77 chu dose khatna la an ni," tiin a sawi.

Sarma chuan October 1 aṭang vek hian Class 9, Higher Secondary first year leh Degree second year-te pawhin offline class an kal tawh dawn tih a sawi. September 20 aṭang khan Class 10 zirlaite chuan offline class hi an lo kal ṭan tawh a ni. Sorkar chuan offline class kalna tur leh, state chhunga activity hrang hrang atan standard operating procedure (SOP) pawh a siam thar leh dawn a ni, a ti.