Meghalaya CM hluiin TMC nen an indawr loh thu a sawi

Meghalaya chief minister hlui leh Congress Legislature Party leader, Dr Mukul Sangma chu an party hotute thiltih danah a lungawi lo a, hetih lian All Trinamool Congress (TMC) chuan a party-ah lut tura sawmin an bia nia sawi a ni. Mahse Sangma chuan hei hi phain, TMC hotute nen an indawr loh thu a sawi thung.

Meghalaya-a Congress party chhungah buaina a awm mek a, central lama party hotuten Meghalaya Pradesh Congress Committee (MPCC) president atana Vincent Pala an ruat thar chungchangah CLP leader Sangma an rawn loh avangin a lungawi lo hle a ni.

Party hotute chet dana a lungawi loh avangin Mukul Sangma hian Congress chhuahsan a tum nia sawi thawm a awm a, party dang zawm a tum nia sawiin TMC bakah BJP pawh sawilan a ni bawk. Mahse Sangma chuan a chungchang report hrang hrang awm chu thu dik lo a nih thu sawiin, party dang aiawhte a hmuh loh thu a sawi.

Hetih lai hian report ṭhenkhat chuan CM hlui hian an state-a hnam lian pathum - Khasi, Garo leh Jaintia-te huam zo tur regional party thar din a tum nia sawi a awm bawk.