Manipur-a eptu party 11-ten BJP sorkar laka lungawi lohna lantir

Manipur-a eptu party 11-te chuan an state leh central-a BJP sorkar policy duh lohna lantirin ni 11 awh tur nawrh an huaihawt mek.

Congress MP Jairam Ramesh chuan ram pum huapa eptu party-ten lungawi lohna a lantir chu Manipur-a eptu pawl 11 chuan zawmin; constitution, democracy leh secularism humhimna turin nawrh hi an huaihawt a ni, a ti. Manipur mipuite chuan central-a prime minister Narendra Modi kaihhruai leh Manipur-a N Biren Singh kaihhruai BJP sorkar chu paihthlak ngei duhin an inlungrual hle a ni, a ti.

Manipur Pradesh Congress Committee (MPCC) president N Loken Singh chuan Modi-a kaihhruai BJP in thuneihna an chan hnuah mipuite tawrhna a nasa tawh hle tih sawiin, BJP chu sumdawng lian leh hausate thlawptu, mipui nawlpuite leh harsa zawkte ngaihsak loah a puh. "Ṭhangthar zawkte tan BJP sorkar hi paihtla tura kan inlungrual a hun takzet tawh a ni," tiin a sawi.

Manipur sorkar chuan state economy chawikang zo loah a puh a, economy dinhmun chhe zel chu state-in sum a lakluhna pawimawh, farming leh a kaihhnawih sector dangte state sorkarin a ngaihsak tawk loh vang tih a sawi bawk.