Assam police-ten nawrh huaihawt zinga 2 kaphlum

Assam-a Darrang district-a Sipajhar area-ah Ningani khan sorkarin dan loa awm nia a sawite hnawtchhuak tura eviction drive a neih duh loa nawrh huaihawtte chu Assam police-ten silaiin an kap a, nawrh huaihawt zinga mi pahnih an thi a, hliam tuar eng emaw zat an awm bawk.

Police-te chetdan rawng tak hi social media lamah pawh a darh nasa hle. Video darh zingah hian district thuneituten an chhawr, professional protographer Bijay Shankar Baniya-a'n police-ten an kah tluk tawh pakhat a sawisa zui lai pawh hmuh tur a awm a, a sawisak lai hian a bulah Assam police-te pawh an awm reng a ni. Baniya hi man a ni tawh nia sawi a ni.

Sorkar chuan Sipajhar biala sorkar rama dan lo awmte hian awmna ramah hian state farming project kalpui a tum nia sawiin chhuak turin a ti a, mahse hei hi duh loin he hmuna awmte hian hnawhchhuah tuma kal police-te chuan an lo dang a ni. Police-te chuan tualchhung mite hian lung nena an lo beih avangin an chhan let a ngai niin an sawi. Mahse video darh tam takah chuan police-te hian thingkung phen aṭanga pungkhawmte silaia an kap lai hmuh turte pawh a awm.

Kirakota Char-a chengte chuan Nilaini zanah chhuak tura hriattirna hi an dawng chauh nia sawiin, Ningani zinga lungawi lohna an lantir hnuah thuneitute chuan chhuahtir an nih hmain an insawnna tur ngaihtuahsak an tiam tih an sawi. Mahse district aiawhtute an kal hnuah police-te hian pungkhawmte lamah silai hi an hmetpuak ta mai niin an sawi.

Hetih lai hian Superintendent of police, Assam chief minister Himanta Biswa Sarma unaupa ni bawk Sushanta Biswa Sarma chuan tualchhung mite hian lunga an beih avangin police-te hian an chhang let niin a sawi thung. "Kan police zingah pakua bakah civil mi pahnihin hliam an tuar a, an vai hian hospital-ah dah niin, boruak pawh a pangngai leh tawh a ni," a ti. Sarma hi eviction drive neihna hmunah hian a awm ve a, police-te silai hmehpuah pawh ngaihven loin a khap lo nia sawi chungchang chu chhangin, "A hmun hi a zau tham a, he thil thlen lai hian kei chu hmun dangah zawk ka lo awm a ni. Thil thlen dan dik tak hi kan chhui chiang ang," a ti.

CM Himanta Biswa Sarma kaihhruai cabinet chuan an state-a Darrang-a Gorukhuti leh Sipajhar-a sorkar ram bigha 77,000-a zau chu thlai chinna ram atana siam turin, heng hmuna dan loa awm nia sawite chu chhuahtir an lo rel tawh a ni. Kumin June thla aṭang khan Darrang hian heng mite chhuahtir tuma hmalakna, eviction drive hi ṭum thum nei tawhin, a cheng tam berte hi Muslim an ni.

Assam sorkar chuan Ningania thil thleng chungchang hi judicial inquiry nei turin thupek a tichhuak a, Gauhati High Court judge hlui kaihhruaina chhui chian a ni dawn tih official thuchhuah chuan a tarlang.