NIT Meghalaya-in Shillong Chamber Choir dintu chawimawina hlan dawn
National Institute of Technology, Meghalaya chuan Shillong Chamber Choir dintu, Neil Nongkynrih chu music field lamah a thawhhlawk avangin chawimawina, honorary doctorate an hlan dawn tih nimin khan institution thuchhuah chuan a tarlang.
Padma Shri chawimawina pawh lo dawng tawh, Nonkynrih hian October 1-a NIT annual convocation neih hunah union education minister Dharmendra Pradhan hnen aṭangin he chawimawina hi a dawng dawn a ni.
Kum 51 mi, Nongkynrih hian multi-genre choir, Shillong Chamber Choir hi kum 2001-ah dinin, mentor leh conductor-ah a awm zui zel a ni. Kum 2010 khan India's Got Talent reality TV show-ah pakhatna niin, 6th World Choir Games for Musica Sacra, Gospel and Popular Music-ah award pathum a dawng tawh bawk. US President a nih laia Barack Obama-a'n India a rawn tlawh ṭum khan a lawmna inkhawm, Rasttrapati Bhavan-a neihah an zai tawh bawk a ni.