Hmarchhak mi rethei nuai 6.55 hnenah IOC-in LPG connection a thlawin a pe dawn

Indian Oil Corporation chuan hmar­chhak hmun hrang hranga hmeichhe rethei awmna chhungkaw nuai 6.55 hnenah LPG connection a thlawnin a pe dawn a, hei hi smokeless village siamna kawnga sorkar laipui hmalakna niin thingtlang khaw 6,741-ah LPG Connection hi pek a ni dawn a ni.

Indian Oil Corporation Chief General Manager (IndianOil-AOD) Uttiya Bhattacharyya chuan LPG Connection an pekna tur khuate hi smokeless village-a siam tuma hma an lakna te a nih thu sawiin, chhungkuaa hmeichhe awm te hmingin connection hi an pe dawn tih a sawi.

Gram Swaraj Abhiyan programme hnuaiah company hian chhungkaw nuai 6.55 hnenah LPG Connection hi a pechhuak dawn tih a sawi a, heng zinga khaw 3,042 chu Assam chhunga mi a ni dawn a, Assam-ah hian connection nuai 2.4 pek a ni dawn a ni.

He programme hi Pathianni khan kalpui ṭan a ni tawh a, May 5-ah zawh hman tum a nih thu Bhattacharyya chuan a sawi.