Manipur mi kum 40 bo hnuah Mumbai-ah hmu
Manipur pa pakhat Khomdram Gambhir chu kum 40 kaltaa Imphal aṭanga a bo hnuah Mumbai police-te chuan Pathianni khan a awmna chin an chhuichhuak a, kar leh hi chuan a chenna ina thawn haw leh hman beisei a ni.
Police-te chuan Gambhir hi Manipur Rifles-ah kum sarih a ṭan tawh thu an sawi a, 1978 khan a chhungte hrilh loin Imphal-a an in a chhuahsan, hemi hnu hian hmuh zui a ni tawh lo tih an sawi.
Gambhir-a nau Khomram Kulachandra chuan a u hian nupui a neih tawh thu leh a nupui nen hian an inṭhen thu a sawi a, an inṭhen hnu thla hnihah an in a chhuahsan tih a sawi bawk.
A bo aṭanga kum khat liam hnuah hian Mizoram-ah a awm tih hriatchhuah a ni a, mahse a chhungte an thlen meuh chuan Mizoram hi a lo chhuahsan leh hman tawh a ni.
A bo chhan hi hriat ni lo mah se a nau chuan rilru hahna nei ang taka a lan ṭhin thu sawiin midang bulah a sawichhuak ngai lo thung niin a sawi.
Hun rei tak a chhungte hian zawng zui mah se a awmna chin hi an hre thei lo a, mahse Inrinni zing khan Kulachandra chuan a unaute fa pakhatin street photographer pakhat video lak a hmuhah a unaupa hi a lo lan ve thu a sawi a ni. Video hi nikum October thlaa YouTube-a upload a nih thu report chuan a tarlang.
Gambhir-a chhungte hian Mumbai Police-te hnenah an hriattir tawh a, karleh hi chuan Imphal-a an in thlenpui leh hman beisei a ni.
Political activist Angellica Aribam chuan Mumbai Police-te chu fakin kum 40 lai bo tawh awmna chin an chhuichhuak thei chu lawmawm a tih thu a twitter-ah a ziak a ni.