Nagaland : Kohima-ah Free Wi-fi Hotspot dah dawn
Nagaland-a People’s Democratic Alliance (PDA) sorkar thar chuan state khawpui Kohima-ah leh state chhunga Deputy Commissioner office zawng zawnga free WiFi hotspot dah an tum tih an tarlang.
Nagaland Information technology, Science & Technology and New & Renewable energy Adviser, Mmhonlumo Kikon chuan Nagaland Innovation Expo 2018 Kohima-a neihah Inrinni khan thu sawiin Kohima leh DC Office zawng zawnga free Wifi Hotspot dah vek an tum thu a sawi.
Nagaland Innovation Expo 2018 hi Kohima Science College Students Union at Jotsoma (KCSUJ) buatsaih niin Department of Science & Technology in an sponsor a, Department of Higher Education chu co-sponsor an ni bawk.
Kikon chuan free Wifi siamna tur khawl dahna tur hian thla eng emaw zat chu a la ngai dawn tih sawiin hmanraw ngai te dah tur hian hun a duh ve deuh tih a sawi. Zirlaite hmakhua ngaih vang leh mipuiin an mamawh avanga free Wifi hi dah an nih dawn thu a sawi.
Kikon chuan zirlai ten ṭangkai taka an hman a beisei thu sawiin an academic career-ah hmasawnna a thlen ngei a beisei thu a sawi bawk. Nagaland Innovation Expo buatsaih a ni chu lawmawm a tih thu sawiin, sorkar pawhin an thlawp thu a sawi a, Expo chu a ṭhan zel a rin thu sawiin rah ṭha tak a chhuah a beisei thu a sawi bawk.
Nagaland-ah hian tunhnai kum sarih chhung khan mobile leh internet connectivity a chhe hle a, ramchhunga a chhiatna ber pawl zinga mi a ni. BSNL leh service dang pawh tunhnaiah khan Kohima-ah a chhe lehzual hle a, hetih lai hian BSNL lam thuneitu te chuan an beng an la chhu ngawng tlat niin report chuan a tarlang.