Dutch champion PSV Eindhoven

Netherlands-a league sang ber Dutch Eredivisie-ah PSV Eindhoven an champion a, match thum khelh tur la awm mah se Pathianni zan khan anmahni hnaih bertu Ajax chu 3-0 a an hneh avangin an champion ta a ni.

PSV tan hian Gaston Pereiro, Luuk de Jong leh Steven Bergwijn te chuan goal khat ṭheuh an khung a, Ajax-in a chhanletna tur an nei thei lo. Si thum an phurh hnuah Ajax an talbuai a, Nicolas Tagliafico chu yellow card pahnihna a hmuh avangin minute 80-naah hnawhchhuah a ni a, minute thum chauh a liam tihin Siem de Jong chu hnawhchhuah a ni ve leh bawk.

'De Jong' unaua naupang zawk Luuk-a'n PSV tan a khel a, Ajax an hnehna inkhelah goal a khung bawk - zan duhawm bik a ni. Hetihlai hian a unaupa Siem de Jong erawh hnawhchhuah a ṭul a, unau pahnihin an hun hman dan a in ang lo hle.

PSV hi an player hlui Philip Cocu enkawlna hnuaia khel an ni a, Barcelona tan pawha lo khel tawh coach enkawlna hnuaia league nomawi an vawi thum chawina chiah a ni - tun season chhiar telin season nga a kaihruai tawh a, a record hi chhuantham a ni.

Hetihlai hian champion lai Feyenoord chu palinaah an awm a, season hmasaa an match tawp bera Dirk Kuyt hattrick hmanga champion team hian Liverpool forward hluiin inkhelh a chawlhsan hnuah season hmasaa an zinkawng ngaihnawm an chhunzawm thei lo.