Darrang-a buaina chhuakah PFI inhnamhnawih : Assam CM

Assam chief minister Himanta Biswa Sarma chuan kar liam taa Darrang district-a sorkar rama awmte chhuahtir tuma hmalak a nih ṭuma buaina chhuakah, Islamist extremist group Popular Front of India (PFI) an inrawlh niin a sawi.

Kar liam ta Ningania Darrang district-a tualchhung mite leh police-te inkara buaina chhuakah khan police-te silai hmetpuahah mi pahnih an thi a, thi zinga pakhat zawk hi naupang kum 12 mi a ni. Mi 15 velin hliam an tuar bawk a, hliam tuar zingah hian police pakua an tel.

CM Sarma chuan, heng lai rama chengte hnenah hian thla rei vak lo liamtaah khan mi ṭhenkhat kalin, chhuah tir an nih lohna turin sorkar pawh an lo hmin ang tih an hrilh a, an hnen atangin pawisa khawnin cheng nuai 28 an lakhawm a ni, a ti. Hetiang titute hi an hming pawh an hre tawh niin a sawi bawk. "Sorkarin eviction drive a neih tur chu an dansak theih tak loh avangin tualchhung mipuite chu fuihpawrhin buaina an siam ta a ni. He thila inhnamhnawih mi paruk hming pawh kan nei tawh a ni," a ti.

Sangma chuan buaina a thlen hma ni hian PFI hian ei tur keng nia insawiin a hmun hi an lo va tlawh a, an zingah hian college lecturer pawh a tel a ni, a ti. Heng mite hi sorkar chuan a chhui tur thu leh, sorkar laipuiah pawh PFI chu dan pawna hnawl tura ngenna an thlen thu a sawi.