Meghalaya sorkarin ISL qualify club hnenah Rs vcb 1 pe dawn

Meghalaya sports minister Banteidor Lyndoh chuan Meghalaya state chhung football team, Indian Super League (ISL) khel thei tura tlingte chu state sorkarin cheng vaibelchhe khat a pe dawn tih a puang.

Minister hian October 4-25 chhunga Bangalore-a I-League qualifier neih tura tel tur, Ryntih Sports and Cultural Club thlahna hun hmanah he thu hi a sawi a ni.

State chhunga football club tam tak chuan sum lama harsatna an neih avangin hma an sawn thei lo a, sorkar lamin a ngaihsak tawk thin loh avangin an harsatna hi a belhchhah ṭhin a ni, a ti a, "Tunah erawh chuan sorkarin local football club zinga 2nd Division I-League qualify chu Rs nuai 10 a pe ṭhin dawn a, I-League qualify chu Rs nuai 40 leh ISL qualify chu Rs vaibelchhe khat a pe tawh dawn a ni," a ti.

Cheng vaibelchhe 34 senga JN Sports Complex thuam ṭhatna tur tender pawh tihchhuah a nih thu minister chuan sawiin, artificial turf chu natural turf-a thlak vek a ni dawn tih a sawi. "Rs vcb 100 vel sengin indoor multipurpose sports complex sak a ni dawn bawk a; swimming pool, basketball, tennis court bakah indoor games facility dang pawh dah an ni ang," a ti.

State sorkar chuan football bakah sports discipline dang, boxing, archery, athletics leh a dangah pawh hma an sawn theihna turin theihtawp a chhuah zel tih a sawi bawk.