Tripura : CPI(M) Councillor darkar 12 bo

Tripura-a Communist Party of India-Marxist (CPI-M) Agartala Municipal Corporation Councillor Malay Chakraborty chu Thawhṭanni zing khan chin hriat lohin a bo a, darkar 12 hnuah nikhaw hre loa hmuh a nih leh thu police-te chuan an sawi a, a taksa hmun eng emaw zatah hliam a tawrh thu an sawi bawk.

Malay Chakraborty (55) hi a chenna hmun Joynagar veng-ah zing dar 7 velah hmuh a ni a, hemi hnu hian chin hriat loha a bo hnuah tlai dar 6.45 khan a chenna aṭanga km khat vela hla Battala crematorium bulah nikhaw hre loa chhar a ni.

Tualchhung miten tunge a ni tih an hriat hnuah a inah hruai kir leh a nih thu a nupui Banasri Chakraborty chuan a sawi a, a pasal chuan hliam na tak a tawrh thu a sawi a, hetih lai hian West Agartala Police Station Officer-in-Charge Subrata Chakraborty chuan Councillor hliam hi serious lutuk a nih loh thu a sawi ve thung.

CPI(M) hruaitu hi damdawi inah hruai a nih hnuah in lamah haw tir leh a ni.

A chhungte hian a awmna chin an hriat loh vang khan police-te hnenah a bo thu hi an hriattir nghal a, thil thlen dan kimchang erawh he thu ziah lai hian hriat a la ni lo.

CPI(M) thupuangtu Goutam Das chuan political party-ten he thil thlengah hian inrawlhna an neih a rin loh thu sawiin zingah a in a chhuahsan hnuah hmuh a ni leh tawh lo tih an hriat thu leh politics inrawlh awma an hriat loh thu a sawi.

BJP-Indigenous People’s Front ṭangrual te chuan Tripura-ah hian thla hmasaa inthlan result puan­ah khan seat 44 lain sorkarna chang mah se Agartala Municipal Cor­poration hi chu Left Front kaih­hruaina hnuaiah a la awm a ni.