Manipur : Mipat hmeichhiatna lama pawikhawihnaa hmalatu tur Special Investigative Units din

State chhunga hmeichhiate laka pawikhawihna zual zel sutkianna turin Manipur cabinet chuan investigative unit din turin thu­tlukna a siam. Heng inves­ti­ga­tive unit din thar tur te hian Manipur sorkar in a hmaa fast track court-a lo din tawh nen ṭang­kawpin hmei­chhe laka pawi­khawihna thleng case an buaipui ṭhin dawn a ni.

Investigation unit pakhat zawk hian Imphal khawpui chhunga thil thlengte a buaipui dawn a, pakhat zawk hian chu hmun hla zawka case awm te a buaipui thung ang.

Hetih lai hian Demonstrator Wahengbam Premila Devi chuan hmeichhe laka pawi­khawihna a thlena mipuiin duh lohna an lantir apiangin sorkar a ngawi tlat zel tih a sawi a, sorkar chu hetiang thil a thlen hi chuan political party bik pawh thliar loin an che chhuak vat tur a ni, a ti.

Hmeichhia leh naupang laka pawikhawihtute hremna hman mek chu a lungawi thlak loh hle tih a sawi a, na zawka pawngsualtute hremna tur dan siam a ṭul thu a sawi bawk.

2018 chhungin pawngsual case 15 thehluh a nih tawh thu a sawi a, state sorkar chuan hma a la chak tawk lo hle tih sawi­in pawngsual tuartu leh an chhung­te lakah dikna lantir a nih tak tak loh thu a sawi bawk a ni.