Nagaland Governor in naupang pawngsualtu thi tura hremna thlawp

Nagaland Governor PB Acharya chuan Arunachal Pradesh hnungzuiin Confederation of Women Entrepreneurs (COWE) India hnen aṭanga petition lut chu a thlawp thu sawiin he petition hi Chief Minister’s Office hnenah a ṭul anga bawhzui turin a forward ve leh.

COWE hian Naga­land-a dan dinglai chu siamṭhaa naupang pawng­sualtu chu thi tura a chungthu rel tura siamṭhat an phutna petition an thlen a ni.

Governor hnena lehkha an thawnah hian COWE chuan hmeichhe naupang venhim chu mi zawng zawng mawh­phurhna a nih thu ziakin hmalakna tur tam tak a awm thu an ziak a, pawikhawihtu hnena hremna na tak pek chu hmalakna pawimawh tak pakhat a nih thu an ziak.

Confederation of Women Entrepreneurs of India chuan hmeichhe nau­pang pawngsualtu chungah chuan thi tura hremna emaw dam­chhung lungin tang tura hrem emaw an ngiat thu an petition-ah chuan an ziak a, naupang pawng­sual case chu thla ruk chhungin dik taka chinfel an duh thu an ziak bawk.

Petition hi mi tam takin an thlawp thu an ziak a, society chhunga section hrang hrangin an thlawp bakah mi 15, 000 velin hun reilo te chhungin an thlawp tih lantir nan an hming an ziak tih an tarlang a, mi sang chuangin an hming an ziah belh zel tih an tarlang bawk. Hmeichhe pawl 15 in an thlawp tih an ziak lang bawk a ni.

Governor hian COWE chairman cum national president, Uma Ghurkha chu Mumbai-ah a hmu tawh nghe nghe a, naupang pawngsual chungchang hi an sawidun a ni.