Assamese Film in US Film Fest-ah nomination 8 hmu
Assam in harsatna nasa tak a tawh lai behchhana film siam “Xhoihobote Dhemalite” (Rainbow Fields) chuan US-a neih tur Love International Film Festival (LIFF)-a award dawng thei turin category pariatah nomination a hmu.
He film hi Mumbai mi Bidyut Kotoky-a direct niin category hrang hrang best feature film, director, screenplay, actor (Nakul Vaid), actress (Dipannita Sharma), supporting actor (Victor Banerjee), cinematography (Satya Prakash Rath) leh score (Anurag Saikia)-ah te award dawng thei turin nomination a hmu a ni.
Love International Film Festival hi US-a Los Angeles-a neih tur a ni a, July 7 hian Beverly Hills-ah award hmu tute hi puanchhuah an ni ang.
Film director Kotoky chuan nomination an hmuh avanga lawmawm a tih thu sawiin chawimawina a nih thu a sawi a, cinema kaltlanga khawvela inpawhna ṭha zawk leh remna lentir tuma hmalakna festival-a nomination an hmu chu thil hlu tak a nih thu a sawi.
Rainbow Fields hi thil tak tak thleng behchhana film siam niin 1980 chhoa Assam in buaina nasa tak a tawh laia naupang pakhat psychological trauma nei chanchin a ni.
He film hian nikum khan Hollywood International CineFest-ah Best Foreign Film Award a lo dawng tawh bawk a, Indian Panorama of the International Film Festival of India (IFFI), Goa-a neihah pawh chhuah a lo ni tawh nghe nghe.
Assam film Industry hian tunhnaiah hlawhtlinna hrang hrang a lo hmu zeuh zeuh tawh a, tunhnai lawkah pawh khan Assamese film “Village Rockstars” chuan National Award dawngin best feature film-ah thlan a lo ni tawh.