Assam-ah kar 2 chhungin LPG connection nuai 6.5 pe dawn

Indian Oil chuan Assam-a thingtlang khaw 3000 chuang 'smokeless village'-a siam a nih theih nan May 5 hi chuan LPG connections nuai 6.50 pekchhuah hman an tum thu an tarlang.

Hmarchhaka thing­tlang khaw eng emaw zat 'smokeless village'-a siam tura April 14 aṭanga kalpui ṭan a nih aṭang khan Indian oil chuan nasa taka hma an lak mek thu an tarlang.

Nilaini-a press conference neihnaah Uttiya Bhattacharyya, chief general manager, Indian Oil (Assam Oil Division state office) chuan Assam bik­ah thingtlang khaw 3042 'smoke­less village'-a siam an tum thu a sawi a, May 5-a hna zawh hman an tum avangin kar hnih chhungin LPG Connection nuai 6.55 tal an pekchhuah hman a ngaih thu a sawi.

May 5-a hna zawh hman tura thupek hi ‘Gram Swaraj Abhiyan’ hnuaia siam a ni a, hemi pual hian ministry of Petroleum and Natural Gas chuan vawiin hi ‘Ujjwala Diwas’-ah an puang dawn nghe nghe a ni.

Bhattacharyya chuan chak taka hma an lak mek thu sawiin an tum hi tihhlawhtlin ngei an tum thu a sawi bawk.

Ujjwala Diwas peng pakhat atan hian LPG pan­chayats huaihawt a ni dawn a, hetah hian hmeichhia 500-700 vel chu kohkhawm an ni dawn a, ei­rawng bawlna atana LPG hman ṭhatna leh hlawkna te an sawi­ho dawn a ni.

‘Ujjwala Diwas’program hian ramchhung hmun hrang hrangah thingtlang khua 21058 hma an la dawn a, Assam bikah hian khaw 3042 hi thlanchhuah an ni.