Defence Minister in Indo-China border-a Air force Exercise neihna tlawh

Union Defence Minister Nirmala Sitharaman-i chuan Ningani khan Arunachal Pradesh-a Indo-China border-a Indian Air Force-ten exercise lian tham tak "Gagan Shakti 2018 " an neihna hmun chu tlawhin Air Force-te inbuatsaih dan te a enpui.

Sitharaman-i hi Upper Assam-a Chabua Air Force Station-ah ṭum hmasain heta ṭang hian Mi-17 helicopter hmangin Arunachal Pradesh-a Pasighat a pan leh a ni.

Pasighat Advanced Landing Ground-a Sukhoi Su-30 MKI fighter jet thlawkchhuak lai leh C-130J Super Hercules transport aircraft ṭum lai te a enpui a, Mi gunship-a rocket dah a nih dan chungchang pawh hrilhfiah a nih thu Air Force thuchhuah chuan a tarlang.

Defence Minister leh Chief of Air Staff, Air Marshal Birender Singh Dhanoa chuan tower aṭangin exercise hi an en a, Sukhois hian 1,000 pounder bomb pathum a thlak lai leh Mi17 in rocket a kapchhuak lai te an thlir dun.

Defence Minister chuan darkar hnih chhung lekin western frontier aṭanga eastern border an thlen theih tawh thu sawiin Air Force-te hian hetianga exercise pui tham hi an la neih ngai loh thu a sawi. Hmasawn zel dan tur pawh an ngaihtuah tih a sawi bawk.