Tai-Ahom leh Matak hnam hruaitute'n Assam CM hmu

Assam chief minister Himanta Biswa Sarma chuan Pathianni khan scheduled tribe (ST) status pek phuttu, Tai-Ahom leh Matak hnam hruaitute chu an thil phut chungchangah a hran ve vein a kawm.

Sarma chuan Tai-Ahom hruaitute hnenah an state chhunga tribal pawl lian ber, All Assam Tribal Sangha (AATS) chu ST status an phut chungchangah hian inbiakna neihpui turin a hrilh a ni. AATS hi sorkarin state chhunga ST certificate pek chin tura rawtna siam turin thuneihna a lo pe tawh a ni.

Matak hnam hruaitute nena an inbiaknaah, CM Sarma chuan ST status an phut chungchang chu sorkar laipuia thlensak turin state sorkar chuan a thuphungin a remtihsak tawh tih a sawi bawk.

Tai-Ahom leh Matak hnam bakah, tea tribe (Adivasis), Koch-Rajbonshi, Moran leh Chutia hnam pawhin ST status pek hi an phut bawk a, kar liam ta Inrinni khan Moran leh Chutia hnam hruaitute hian CM hi an lo hmu tawh bawk a ni.

CM chuan Tai-Ahom hnam chu tribal block and belt-ah protected class status pek an ni dawn tih a sawi a, an hnam ṭawng chawilarna turin Tai Language Teaching Centre pawh state sorkar chuan a din dawn a, Assam-a Ahom lal hmasa ber Sukapha lim pawh Guwahati-a state secretariat Janata Bhawan-ah siam a ni ang, a ti. Jorhat-a Sukapa hriatrengna,‘Sukapha Samannay Kshetra’ siam chu tourist attraction atana chei ṭhat a ni dawn tih sawiin, CM chuan Tai Ahom Development Council tana sum ruahman, cheng vaibelchhe 125 chu November 30-ah pek chhuah a ni dawn tih a sawi bawk.

Matak hnam hruaitute hnenah zirna in hrang hrangah Matak hnam tana chanpual siamna tur leh, ram chungchanga buaina an neihte chinfel dan ngaihtuah turin department hrang hrang committee-te chuan hma an la dawn tih Sarma chuan a sawi a, Matak Development Council tan November 30-ah cheng vaibelchhe 25 pek chhuah a ni dawn tih a sawi bawk a ni.

Assam CM chuan Assam leilung fa, hnam hrang hrangte chu hnam dangte laka Assam venhimna turin inlungrual leh pumkhata awm turin a chah.