AP sorkar thlawpna hnukdawk turin NSCN-in MLA 11 hrilh

National Socalist Council Of Nagaland (NSCN)-GPRN chuan Arunachal Pradesh-a Tirap, Changlang leh Longding-a Naga MLA 11-te chu chief minister Pema Khandu kaihhruai sorkar an thlawpna hnukdawk turin an hrilh.

NSCN/GPRN chuan thuchhuah an siamah, sorkar laipuiin Arunachal Pradesh-ah Naga hnam chenna biala 'NAGA' tih thu paih an tum chu an dem thu sawiin, sorkar laipui chuan Arunchal Pradesh sorkar leh Naga hruaitu zinga ṭhenkhatte a ruka inrem puiin, 'Any Naga Tribe' tih chu constitution aṭanga paih a, Tangsa, Tuts, Nocte leh Wancho hnam chu identity hran anga pawm a tum a ni, an ti. He thil hi Naga hnam hmusitna leh, India sorkarin Naga hnam dikna, nihna leh history-te a ngaih pawimawh tawk loh zia lantirna a ni, an ti. Kum za tel chu tuna Arunachal Pradesh, Manipur, Nagaland, Assam leh Eastern (Myanmar)-a an awmnaah hian Naga-te chu thlamuang takin an lo awm tawh tih an tarlang.

'NAGA' tih hi Naga hnam hrang hrangte phuarkhawmtu a ni a, he ṭawngkam paih hi an remti ngai dawn lo tih sawiin, India-in awp beh a tumna chu hnawlin an do let zel dawn tih an sawi bawk. Naga hnam tinte chuan hetianga ṭhendarh tumna hnawl leh dodal tur hian mawhphurhna pawimawh tak an nei vek tih an tarlang a, hei vang hian Naga MLA leh hruaitute zinga he bill thlawptute chu Naga dodaltute angah an ngaih tur thu an sawi bawk.