Sorkar laipuiin engmah la tiam thei lo : Conrad Sangma

Meghalaya chief minister Conrad K Sagnma chuan an state-a Inner Line Permit (ILP) system hman hun tur chungchangah sorkarin engmah a la tiam thei lo tih a sawi. CM hi tun hnaiah New Delhi-ah zinin sorkar laipui hotute a zu kawm a ni. 

Hetih lai hian state pawn lam mite an chim ral zel tur venna atan Meghalaya-a NGO hrang hrang chuan ILP system hman thuai phutin sorkar laipui an nawr mek a ni.

Pawl hrang hrangte chuan state leilung fate venhim leh humhalhna atan ILP system hi hman thuai an duh tih an sawi. Khasi Students' Union (KSU) pawhin prime minister Narendra Modi hnenah inrawlh turin an lo ngen tawh a ni.

Nikum December thlaa state assembly-in ILP system hman a nih thuai theihna tura sorkar laipui nawrna tur resolution a lo pass tawh chungchang pawh sawichhuakin, CM chuan state legislature chu a dinna ngaiah a la ding reng a ni, a ti. 

State sorkar chuan union home ministry hnenah a khat tawkin a nawr reng tih a sawi a, union home minister Amit Shah chuan hemi chungchang hi ala zir chiang mek a ni, tiin Sangma chuan a sawi.